شعر لری
دِه هر چی هاستی تو داشتی
یِه کم مهر و محــبت کو حلالِت هر چی وِرداشتی
****
دونِم بیــــمَه وِبــال جُو چی بَکِم روزگارِم هاست
تا وقتی پیل و پَر داشتِم هِه هر سری صدایی داشت
~~~~~~~~~~~~~~~~
گیس خیال
دلم گیس خیالت شونه میکه
غمت گرگر منه دیوونه میکه
دل ویلون مه شو چی کموتر
ده زیر طاق برمت لونه میکه
عابد میرزاییان چگنی
~~~~~~~~~~~~~~~~
رسم رفاقت
ره عشق وصالت چو گلاکم
بیابونه همش تا آخر خط
ده درس اول رسم رفاقت
مه تجدید غمم نقطه سر خط
مراد جلائی (جلا)
~~~~~~~~~~~~~~~~
خنه گل
سی نوم خدا چنی رنگینه لویاش
چی خنه ی گل چه دلنشینه لویاش
دونی که چمه زلم ده عشقش میره
چون نقشه ی کشتنم کشینه لویاش
عابد میرزائیان چگنی
~~~~~~~~~~~~~~~~
پلکه نوم
شه دسه کیا دوارم جو برینه
ئو پارگوشیا همه پایان کشینه
ای پلکه نومم ایفتاده نوینی
که تخته دوندلاویز اسینه
مراد حسین پاپی بالاگریوه
~~~~~~~~~~~~~~~~
بارو
و شیشه میزنه بارون نم نم
خیال تاووسون میشوره کم کم
دلش می حا بهاری سر بییره
زمسونیان بوره ده کل عالم
مراد جلائی ( جلا)
~~~~~~~~~~~~~~~~
شیر چشت
گتم شیری بوئم که کس نگته
کسی سی ناز چش مس نگته
اما شیری چشت گت وا اشاره
که کس وا زون و برم و دس نگته
محمد علی ساکی
