تَل خدا کو
چی کُرِ بی دا مو اِيخُم هَر کُری
گپ بِزنه سی دلِ تنگُم لُری
" رهدار "
" تَلِ خُدا کو"
رَهدي و پيوارِ دلُم سُهديه
پَتيرِ لارُم سرِ تَش پُهديه
چی نون تيری به پُشتير غم
چالِه مِه کَندِی به سا چير غم
هی بسرُم پَرسُم غم رهديه
به کو وُلات بازُمِ پِرنيديه
مَر اَوِ رُويی چَمِت اوبيدمه؟
تليش تلاش غمت اوبيدمه؟
کِلورمه پُهلکِ غم زيديه
هزار يک بافه رقم زيديه
کَه به دَرُم نکِرده وارهسيه
هورته پُرکِردی و وَربهسيه
خنده وه ری لَوِه مو وَرسُهده بی
دی غمِ عشقت دلُمه کُهده بی
"ری تی پَنَک" هی اِکُنی وا دلُم
وِه دَهس باد داد يه سرمنزلُم
مَنده دلُم به بَستِکون پُری
دين تو گشتُم بخدا هر تُری
دلُم که کُوم کِرده ی ديدارته
سي ت اِبُره پَل هُ که غمخوارته
دََنگِ دو دنيا دِراَوردی سرُم
جووه رِسباينه کِردی وَرُم
هَلهَله کوسه به سرُم وِرديَه
اَقه خدانه سيچنو دِرديه
بَسکه نگُهدُم پوکِسُم اَی خُمَی
چی تُکِ خينی تُکسم اَی خُمَی
چی تُکِ خينی به رهی خاکِلُون
جلدی جم اوبيدُم و وابيم نِهون
وُر رَهِ غم وابيدُمه خاکِ نَک
جِنگر بادی مونه وَند وُر دَلَک
صد گِله دارُم مو ز تو ای غُوار
سيچه تو وَنديم سَرِ برگِ کُنار
هی به دََگشتُم به صدا پا لِوِشت
بَردِ غمت بُرده ز دستُم زِهِشت
سی تو گُدُم سهده دل سُهده زار
تَل خداکو مونُم و او کُنار
